MAA….

Besan ki sondhi roti par
khatti chatani jaisi maa
yaad aati hai chaukaa-baasan
chimataa phukani jaisi maa

baans ki khurri khaat ke uupar
har aahat par kaan dhare
aadhi soi aadhi jaagi
thaki dopahari jaisi maa

chidiyon ke chahakaar men gunje
raadhaa-mohan ali-ali
murge ki aavaaz se khulati
ghar ki kundi jaisi maa

bivi, beti, bahan, padosan
thodi thodi si sab men
din bhar ik rassi ke uupar
chalati natani jaisi maa

baant ke apanaa cheharaa, maathaa,
aankhen jaane kahaan gai
phate puuraane ik alabam mein
chanchal ladaki jaisi maa